Etu ndị uweojii si zọpụta ọtụtụ ndị NYSC ndị ojiegbe tọọrọ n’Ihiala

Ndị uweojii n’Anambra Steeti azọpụtala ndị otu ‘National youth Service Corps’ mmadụ iri na ise ndị ojiegbe tọọrọ n’ụbọchị Tuzde.

Ọnụ na-ekwuru ndị uweojii Anambra bụ Toochukwu Ikenga kwuru na ọ bụ n’ebe elekere iri na otu nke ụtụtụ ụbọchị iri na anọ nke ọnwa Febrụwarị, ka ha zọpụtara ndị a ji otu afọ efe ala Naịjirịa n’aka ndị omekome jichiri ha.

“Ndị NYSC a mechara ọzụzụ ha izuụka atọ n’ogige ha dị n’Eziama-Obaire, ‘okpuruọchịchị Nkwerre, Imo Steeti, ma na-alaghachi Legọs, oge ndị ojiegbe amaghị ndị ha bụ wakporo ha,” Ikenga kwuru.

“Ndị ojiegbe a buuru ha tinye isi n’okporoụzọ si Ihiala gawa Orlu ebe ha nọrọ jichie ha. Mana oge ndị ekperima a chọpụtara na ndị uweojii na-esochi ha azụ, ha gbahapụụrụ ndị NYSC ha tọọrọ ma gbalaga ọsọ.”

Ikenga kwuru na ha zọpụtara ndị ahụ na-efe ala nna, ma hazikwaara ha etu ha ga-esi malitekwa njem ha.

Mpaghara Ihiala n’Anambra steeti so n’ebe ọnọdụ nchekwa kacha dị njọ n’Ọwụwa Anyanwụ Naịjirịa.

Ọ bụ n’okporoụzọ a si Ihiala gawa Orlu ka ndị ojiegbe nọrọ wakpoo ma gbuo ndị agha Naịjirịa abụọ dịka ha na-eme njem maka agbamakwụkwọ ha n’ọnwa Eprel afọ 2022.

Ugboro ugboro ka ndị ọrụ nchekwa na ndị ekperima na-akwakọrịta mgbọ na mpaghara ahụ.

Ndị uweojii na-ekwu na ọ bụ ndị na-azọ nnwereonwe Biafra, a kpọrọ Ipob n’ịchafụ, na-eme mwakpo ndị a, mana Ipob na-agọ agọ na ọ bụghị ha.