Otu ndọrọndọrọ All Progressives Congress ekwuola na aka chịburu Naịjirịa bụ Olusegun Obasanjo bụ onye aghụghọ na onye ihu abụọ maka ịkpọ oku ka a kwụsị ngụkọ mpụtara ntuliaka ọkwa onyeisiala nke na-aga n’ihu ugbua n’Abuja n’ihi ebubo nrụrụaka.
Ọnụ na-ekwuru otu achụmnta vootu ndị APC bụ Dele Alake kwuru na ebubo a Obasanjọ boro bụ “ịchụpụ ọchịchị onye kwuo uche ya n’ike”, ma kwukwaa na okwu Obasanjo nwereike ịdọghachi Naịjirịa azụ.
“Obasanjo na-ebubo, na-egosighi ihe akaebe ọbụla, na akpatụrụ igwe Bimodal Voter Accreditation System’ aka iji gbochie ya ịrụ ọrụ nke ọma, nakwa mpụtara ntuliaka nke Inec na-akpọpụta nwere nrụrụaka.
“Ọ bụ ihe mwute na ọ bụ onye bụrụla onyeisiala nakwa onye kwesịrị ịbụ okenye a na-akwanyere ugwu na-ekwu okwu dị otu iji tinye ọchịchị onye kwuo uche ya na nsogbu n’ihi mpako na iche naanị maka onwe ya.
“Onweghị ihe akaebe ọbụla iji kwadoo ebubo a na-atọ ọchị nke Obasanjo na-ebo megide ọrụ Inec na-arụ ugbua nke doro mmadụ niile anya,” Dele Alake kwuru.
Cheta na Obasanjo degaara Buhari akwụkwọ ebe ọ nọrọ kwuo na nrụrụaka abanyela n’usoro ntuliaka a n’ihi na mpụtara a na-akpọpụta ugbua egosighi ihe ndị mmadụ kwupụtara oge ha gara tụọ vootu.
Obasanjo kwuru na ụfọdụ ndị ọrụ Inec akwụbaghị aka ọtọ dịka ha megharịrị mpụtara ntuliaka n’ebe dị icheiche, nke mere ha ji jirizie aka nkịtị na-eziga mpụtara ntuliaka kama iji ịntanetị dịka iwu si kwuo.
Ọ kpọrọ Buhari ka o nye iwu ka a kagbu mpụtara ntuliaka n’ebe dị icheiche ebe o doro anya na e mere nrụrụaka.
Obasanjo kpọkukwara onyeisioche Inec bụ Mahmood Yakubu ka ọ gbaa mbọ iji mezie ihe niile e mehiere emehie na ntuliaka a n’ihi na “ọ bụrụ na ejighi BVAS rụọ ọrụ, ọ bụrụkwa na ejighi ịntanetị ziga mpụtara ntuliaka, onweghị onye ga-anabata mpụtara ntuliaka ọbụla ma a kpọpụta ya.”
Leave a Reply