2023: Onye Zọrọ Ọkwa Onyeisiala N’afa LP Ajaala Ndi Naijiria Mma, Gbarụọ Ihu N’usoro Ntuliaka.

Onye zọrọ ọkwa Onyeisiala n’afa otu Labour paati bụ Maazị Peter Obi etoola ụmụafọ Naịjirịa ndị pụtara n’igwe isonye na ntuliaka onyeisiala na ndị ọgbakọ omebe iwu e mere n’abalị iri abụọ na ise n’ọnwa Febụwarị na nso nso a na Naịjirịa.

Onye ndoro-ndoro Labour paati kwuru na ya ga-agbagha usoro ntuliaka onye isi ala site n’ụzọ iwu iji nwetaghachi ikike ndị mmadụ.

Ọ kpọkuru ndị Naijiria na ndị na-akwado ya ka ha bụrụ ndị na-erube isi n’iwu ma ghara ịkpalite ime ihe ike nakwa na Naijiria Ọhụrụ ga-ekwe omume.

Onye bụbu gọvanọ Anambra Steeti ndịda ọwụwa anyanwụ Naijiria kwuru na ntuliaka ahụ enwezughị ihe ekwesịrị maka ntuliaka nwere ntụkwasị obi.

Ọ kpọkulu ụmụafọ Naịjirịa ka ha pụta ịtụ vootu maka ndị Labour Paati na ntuliaka nke ọkwa gọvanọ na ndị omebe iwu steeti n’abalị iri na otu nke ọnwa Maachị.