Aka chịburu mba Amerịka bụ Donald Trump nwere ebubo iri na atop ọhụrụ chere ya n’ihu na steeti Georgia, dịka ndị ọkaiwu kwuru na ọ kpara nkata ịkagbu mpụtara ntuliaka onyeisiala nke afọ 2020.
N’akwụkwọ ebubo ahụ nke pụtara ihe n’ụbọchị Mọnde bụ ụbọchị iri na anọ nke ọnwa Ọgọst, a boro Trump na mmadụ 18 ndị ọzọ ebubo dị icheiche nke gụnyere isonye n’otu ndị omekome, ibo ebubo ụgha na e nwere nrụrụaka na ntuliaka, na ndị ọzọ.
Otu n’ime ndị aha ha dị n’ebubo ọhụrụ a bụ Rudy Giuliani onye bụbu ọkaiwu Trump n’oge gara aga.
Mana Trump kwuru na ebubo niile ndị a bụ ụgha ma bụrụkwa atụmatụ ibuso ya agha iji gbochie ndọrọndọrọ ọchịchị ọ na-azọ.
Nke a bụ ebubo nke anọ a na-ebo Donald Trump n’ime ọnwa anọ. Trump bụkwa onyeisiala Amerịka mbụ a na-akpụpụ ụlọikpe dịka ọ rituchara n’ọchịchị.
Ọkaiwu Fani Willis bụ onye malitere nnyocha maka ebubo ndị a kwuru na Trump na mmadụ iri na asato ndị e boro ebubo ndị a nwere ruo ụbọchị iri abuo na ise nke ọnwa Ọgọst iji nyefee onwe ha n’aka ndị ọrụ nchekwa.
Lee ụfọdụ ebubo ọhụrụ a na-ebo Donald Trump:
- Ịkpa nkata iji ụzọ aghụghọ gbanwee mpụtara ntuliaka
- Ịkpọ odeakwụkwọ steeti Georgia bụ Brad Raffensperger n’ekwentị ma gwa ya ka ọ gbanwee mpụtara ntuliaka n’ụzọ iwu akwadoghị.
- Ịkpa nkata ịkpọta ndị ọrụ ntuliaka adịgboroja iji were ha gbanwee mpụtara ntuliaka na Georgia.
- Ịkụ akwụkwọ ozi adịgboroja iji kwanye ndị omeiwu steeti Georgia ka ha jụ ịnabata ụfọdụ vootu a tụrụ na ntuliaka
Na ndị ọzọ.
Leave a Reply