Ụlọọrụ na-ebu agha megide mpụ na nrụrụaka ego na Naịjirịa bụ Economic and Financial Crimes Commission (EFCC) ekwupụtala na ọ bụ ha nwụchiri nwaokorobịa olu ya na-ada ụda bụ Martins Vincent Otse e ji Verydarkblackman (VDM) mara.
EFCC mere ka ndi ntaakuko mata maka nnwụchi VDM n’ụbọchị Mọnde abali ise nke onwa Mee afo 2025.
Ọnụ na-ekwuchitere ụlọọrụ EFCC bụ Dele Oyewale kwuru na ha nwụchiri nwaamadị ahụ dabere n’ọtụtụ mkpesa ndị na-ewesara VDM iwe nyere n’ụlọọrụ ha.
Oyewale kwuru sị “anyị nwụchiri VDM ka ọ bịa zara ọnụ ya n’ọtụtụ ebubo ụfọdụ mmadụ boro ya.”
Oge a jụrụ ya ma aka ụlọakụ Guarantee Trust Bank (GTB) ọ dị na mkpesa ahụ, Oyewale sịrị na ha dị ọtụtụ mmadụ nyere ya bụ mkpesa ma kwuo na ọ gaghị akpọ aha ha iji chekwaa ha.
Ọ gbakwunyere na ha ga-atọhapụ ya ọ bụrụ ma o mezuo ọnọdụ beelụ ya ma kwuo na a ga-ebuga okwu ahụ ụlọikpe na-egbughị oge.
O mekwara ka o doo anya na ọ bụ n’Abuja ka ha nọọrọ nwụchie nwaokorobịa ahụ.
Leave a Reply