Etu aka si kparala ụmụnwaanyị na-ere ụmụaka n’Enugwu

Ndị uweojii Enugwu Steeti agbaala ụmụnwaanyị abụọ n’anwụ maka ebubo ire nakwa ịtụ ụmụaka mgbere na steeti ahụ.

N’ozi ọnụ na-ekwuru ha bụ Daniel Ndukwe wepụtara, ha sị na ndị ọrụ nke ngalaba SWAT nwuchiri ndị a site n’ama a gbaara ha.

Mgbe ha wuchiri ogige ebe ndị a nọ, ndị uweojii nwuchiri ụmụnwaanyị abụọ dị afọ iri abụọ na anọ (24) na iri atọ na anọ (34) ma zọpụta ụmụaka abụọ ha tọọrọ na-achọ ire.

Ụmụaka abụọ a gụnyere otu nwata nwaanyị dị afọ anọ nakwa otu nwata nwoke dị naanị otu afọ.

Ndukwe sị na nyocha ha mere gosiri na ọ bụ n’abali iri abuo na ano nke onwa Maachị, 2023 ka otu nwaanyị zuuru nwata nwaanyị na-achọ ịgba ọsọ tupu a nwuchie ya n’obodo Ameke-Oduma nke okpuruọchịchị Aniri, site n’enyemaka ndị obodo ahụ.

Ọ gara n’ihu kwuo na o bụ site n’ọgbụgba ama nwaanyị mere ha ji nwuchie nwaanyị nke abụọ n’ụlọahịa Shoprite dị n’Enugwu bụ ebe ọ na-eche ka ọ kpọrọ nwata ahụ.

Otu n’ime ha sị na ọ malitere ire na ịtụmgbere ụmụaka kamgbe afọ 2017, ma kpọrọ ha gaa n’Abuja bụ ebe o reere nwata nwoke ahụ.

Ndukwe gbakwụnyere na nyocha ka na-aga n’ihu ịchọpụta ma nwuchie ndị ọzọ so n’otu a ebe a ga-akpụpụ ndị a n’ụlọikpe.

Akụkọ banyere ire na ịtụmgbere ụmụaka abụrụla chi bọọ anụ ọzọ na Naịjirịa ọkachasị na mpaghara Ọwụwa Anyanwụ.