Etu aga e si agụkọ vootu gị n’ụbọchị ntụliaka 2023

Dịka ntuliaka na-abịa n’abalị ole na ole, igwe mmadụ na-akwado ịga binyere onye masịrị ha aka.

Mana ị ma etu e si agụkọ vootu ndị atụrụ atụ iji họpụta onye meriri?

Ozugbo emechiri ntuliaka, a gụọ vootu n’ihu mmadụ niile tụrụ vootu n’ọdọ ntuliaka ahụ nakwa ndị nnọchiteanya pati dị icheiche.

A na-akpọpụtakwa mpụtara ahụ ngwa ngwa n’ihu ndị tụrụ vootu ka ndị niile nọ ebe ahụ nweike mara onye meriri n’ọdọ ntụliaka ahụ

Onyeisi ndị ọrụ Inec nọ ebe ahụ, ga-edetu mpụtara ahụ a kpọpụtara na Form EC8A bụkwa ‘results sheet’ na Bekee.

O mechaa nke a, o were otu n’ime form EC8A ahụ mapinye n’ahụ aja ka ndị mmadụ hụ otu ndọrọndọrọ meriri ma kesaa ndị nọchitere anya patị ha nọ ebe ahụ ya bụ akwụkwọ ka ha jide maka ihe akaebe.

Ọ bụghị iwu na otu niile ga-ewere ya bụ akwụkwọ EC8A mana ha ga-ebinye aka na ya dịka INEC si kwuo.

Ọzọ, ọ bụrụ na o nwere onye ntaakụkọ nọ n’ebe ahụ a tụrụ vootu, o kwesiri ka enye ya ya bụ akwụkwọ nke ya ọ ga-ebinye aka.

Na ngwụcha, onye ọrụ Inec ga-esezi mpụtara ahụ foto ma ziga ya n’igwe ‘iRev’ bụ Inec Result viewing portal ebe onye ọbụla nọ na Naịjirịa nwereike ịhụ ya ma ha chọọ.

A ga-eburuzi mpụtara ahụ gawa ebe a na-akpọ RAC centre bụ Registration Area Centres na Bekee bụ ebe a ga-agụpụta mpụtara wọọdụ niile ebe a tụrụ vootu (cheta na otu wọọdụ nwereike ịnwezu ọdọ ntuliaka iri na abụọ) n;’ime ha.

Ọ bụkwa ebe a ga-agụkọ mpụtara ntuliaka n’ọdọ ntuliaka niile. A ga-enyekwa ndị nnọchite anya Pati dị icheiche ọhere ị nọ na RAC centre ahụ.

E mechaa nke a, ebe ọzọ a ga-aga bụzi n’ọdọ ngụkọ okpuruọchịchị bụ ebe a ga-agụkọ ma wepụta mpụtara ntụliaka wọọdụ dị icheiche.

A ga-ekenyekwa ndị nnọchianya otu dị icheiche akwụkwọ mpụtara ahụ mana agaghịzi ekenye ndị ntaakụkọ.

E mechazie ya ebe, e buru gawa n’isiụlọorụ Inec nke steeti ahụ bụ ebe ha ga-agụkọ ọkpụrụọchịchị dị icheiche.

Chetakwa na ebe niile emere ngụkọ ntụliaka, a ga-edepụta ya bụ mpụtara n’akwụkwọ ma mapinye ya n’aja ebe mmadụ niile ga-ahụ ya.

Ọ ga-adịgide ebe ahụ rue abalị ole na ole emechara ntuliaka.

Ihe ndị ọzọ ị ga-ama

Ugbua, a na-ejizi teknụzụ ezipu mpụtara ọbụla n’akụrụngwa Inec iji kwụsị nrụrụaka.

Mana a ga-ebukwa ya gaa n’ụlọọrụ dị n’Abuja maọbụ nke dị na steeti ebe Onyeisi Inec ga-enyocha na ọnụọgụgụ akpọpụtara nakwa ọnụọgụgụ ezitere bụ otu ihe

Ntuliaka ọkwa Gọvanọ, ụlọomeiwu nta, ụlọomeiwu steeti ga-akwụsị na isiụlọọrụ Inec dị na steeti ahụ.

Ọ bụ naanị mpụtara ntuliaka ọkwa onyeisiala nakwa nke ụlọomeiwu ukwu ka a na-eziga n’isiụlọorụ Inec dị n’Abuja iji gụkọ ma kpọpụta mpụtara ntuliaka a tụrụ.