Ihe ndị uweojii kwuru maka mmadụ atọ a gbagburu n’Steeti Ebonyi

Ndị uweojii Ebonyi steeti agbaala ama na etu ndị ojiegbe si wụbaa otu ụlọ ndịna na steeti ahụ gbagbuo mmadụ atọ n’ebe ahụ.

Akụkọ si Ebonyi steeti pụta na na nsonso a kọwara na ndị ojiegbe wakporo otu ụlọ ndịna n’Ebonyi steeti gbagbuo nwoke nwee ya bụ ụlọ ndịna bụ Ogbonnaya Nwadibia nakwa mmadụ abụọ ndị ọzọ.

Chris Anyanwu bụ ọnụ na-ekwuru ndị uweojii steeti ahụ kọwara na a nụrụ ụda egbe dara aghara aghara n’akụkụ ahịa Nkwoagu Isu dị n’okpuruọchịchị Onicha na steeti ahụ.

Anyanwu sịrị: “Mgbe anyị wụgara ebe ahụ, ndị ojiegbe ahụ apụọla ngwa ngwa”

“Anyị hụrụ mmadụ atọ a gbara egbe ma bugara ụlọọgwụ ebe e kwuru na ha anwụọla”

Anyanwa kwuru na mgbọ egbe ndị ha hụrụ ghasa  n’ala ebe ahụ bụ nke egbe AK47.

Ọ kọwakwara na ha amalitela nnyocha ịhụ isi ihe mere ebe ahụ.

Cheta na akụkọ a kọwara na ndị ojiegbe bịara ije ahụ ji ọgbatumtum wụbata n’ogige ụlọndịna ahụ ma wakpoo ndị nọ ebe ahụ n’abali Fraịde.

Otu anya hụrụ ihe mere ebe ahụ na-achọghị ka a kpọọ aha ya kwuru “Ihe ruru mmadụ atọ bu egbe wụbatara n’ogige ụlọ ndịna a ma malite ịgba egbe aghara aghara ebe ahụ”

“Oge ha si n’ogige ụlọndịna ahụ pụọ, anyị hụrụ ozu mmadụ atọ ndị nọ n’ime ụlọ ndịna ahụ nke gụnyere onye nwee ya bụ ụlọ ndịna”.

Ndị bi nso ebe ihe a mere nọ n’ụjụ ugbua nke bụ na ha anaghịzị apụta ezi ma elekere ise nke mgbede kwa ụbọchị ruo.

Ebonyi steeti so n’akụkụ Ọwụwa Anyanwụ Naịjirịa ebe akụkọ mwakpo si apụtakarị.

Akụkụ ọwụwa anyanwa Naịjirịa danyere n’ọnọdụ enweghị nchekwa ziri ezi na nso nso a.

akụkọ na-apụta maka mwakpo, ntọrọ, izu ohi nakwa ogbugbu ndị mmadụ nke gụnyre ndị njem n’okporoụzọ.

Ebonyi steeti so n’ebe akụkọ ndị a si apụta dịka ugboro ugboro akụkọ apụtala etu e si awakpo ndị mmadụ nakwa ndị ọrụ nchekwa.

Gọọmentị steeti ahụ hibere otu nchekwa nke Ebubeagu ka ha tinyere ndị ọrụ nchekwa gọọmentị aka n’idokwa udo steeti ahụ mana akụkọ mwakpo ka na-apụta ebe ahụ.