Gọọmentị Anambra Steeti akagbuola ‘sit at home’ n’ ubọchị Mọnde ọbụla Gọvanọ Anambra Steeti bụ Chukwuma Soludo

Gọọmenti Anambra Steeti ekwuola na ha akagbuola atụmatụ ịnọ n’ụlọ a na-eme n’ụbọchị Mọnde ọbụla na mpaghara Ọwụwa Anyanwụ.

Nke a dị n’ozi kọmishọna mgbasaozi bụ Law Mefor depụtara n’akara Facebook ya ma kwuo na gọọmenti ga-amanye nke ahụ n’ike.

O kwuru na tupu gọọmenti Anambra emee mkpebi ahụ na ọ dịghịrị ha mfe mana ọ bụ ihe dị mkpa na e mere site n’etu akụnaụba steeti ahụ si adakpọ site n’ịnọ n’ụlọ kwa Mọnde ọbụla kamgbe ọtụtụ afọ.

Gọọmenti kwuru na ndị ọrụ bekee ọbụla jụrụ ịga ọrụ n’ụbọchị Mọnde ga-enwete naanị pasentị 20% n’ụgwọọnwa ya maọbụ ghara irite ụgwọọnwa kpam kpam.

Ha gakwara n’ihu kwuo na ụlọahịa ọbụla jụrụ imepe ahịa n’ụbọchị Mọnde ga-anata ntaramahụhụ ha nke gụnyere ịgbachi ụlọahịa ahụ.

Kamgbe ihe ruru afọ ise gara aga ka ndị otu chọrọ nwereonwe Biafra bụ Indigenous People Biafra tinyere iwu ịnọ n’ụlọ na mpaghara Ọwụwa Anyanwụ n’ihi onyendu ha bụ Nnamdi Kanu gọọmenti Naịjirịa nwuchiri.

N’ihi ụjọ banyere mmanye ịnọ n’ụlọ ahụ ndị mmadụ jụrụ imepe ụlọahịa, ụlọakwụkwọ nakwa ịgagharị n’ụbọchị Mọnde ọbụla.

Gọọmenti kwuru na ọtụtụ akụnaụba ndị mmadụ alaa n’iyi maka ọnọdụ ịnọ n’ụlọ ahụ, nke a mere ha jiri tinye iwu ka a kwụsị ya kpam kpam.