Gọọmenti Naịjirịa emechala akwalite mmepe nka, ịdị mma n’ọrụ aka.

Dịka otu n’ime mgbalị iji kwalite mmepe nka, ịdị mma n’ọrụ aka (vocational excellence), na asọmpi zuru ụwa ọnụ n’etiti ndị ntorobịa Naịjirịa.Gọọmenti Naịjirịa emechala mmalite National Working Committee nke WorldSkills Nigeria.

Maruf Alausa,Minista Mmụta,  onye mere mmalite kọmitii a na Abuja, kwuru na ebumnuche nke atụmatụ a bụ ijide n’aka na nka a na-amụta na Naịjirịa kwekọrọ na ụkpụrụ kacha mma n’ụwa ma soro ebumnuche WorldSkills Nigeria. WorldSkills Nigeria bụ onye òtù WorldSkills International, ma na-eje ozi dị ka ikpo okwu iji dozie ma mee ka mmepe nka na Technical and Vocational Education and Training (TVET) bụrụ ihe na-akwalite mmepụta ụlọ ọrụ (industrialisation), uto akụ na ụba, na asọmpi zuru ụwa ọnụ.

Iwulite Ndị Ọrụ Asọmpi

Nwamadi a kọwara mmalite a dị ka nzọụkwụ dị oke mkpa n’iwulite ndị ọrụ nwere ike ịsọ mpi n’ụwa niile na ime ka ọdịnihu TVET na Naịjirịa gbanwee nke ọma.

O kwuru na atụmatụ a na-anọchite anya “nkwenye siri ike nke mba n’ịkwalite ịdị mma n’aka, mkpa ya, na ịdị njikere iji tụọ usoro mmepe nka Naịjirịa megide ụkpụrụ kacha elu n’ụwa.”

Dị ka o si kwuo, ikpo okwu a ga-akwadebe ndị ntorobịa Naịjirịa na nka ruru ogo ụwa ma mee ka Naịjirịa bụrụ onye ndu n’ịmepụta ihe ọhụrụ n’aka (skills innovation) n’Africa na gafee ya.

“Ozugbo e mepụtara WorldSkills Nigeria, anyị na-emepe ibe ọhụrụ jupụtara n’ọganihu, asọmpi, na mpako mba. A ga-akpalite ndị ntorobịa anyị ka ha nwee agụụ maka nka, ma kpalie ha ịhọrọ agụmakwụkwọ nka dị elu dị ka ụzọ agụmakwụkwọ ha kacha mkpa,” ka minista ahụ kwuru.

O gosikwara na ụlọ ọrụ dị iche iche ga-erite uru site n’ịnweta ndị ọrụ nwere ike ime ngwa ngwa, ebe mba ahụ ga-eritekwa uru site n’ịbawanye mmepụta, ihe ọhụrụ, na uto akụ na ụba.

Alausa keleere ndị metụtara ya niile maka itinye ntọala siri ike maka Naịjirịa ka ọ sie ike ma bụrụkwa mba bara ụba, kwekọrọ na ọhụụ nke ọchịchị Onye isi ala Bola Tinubu.

“Okwu m n’aha ngalaba n’ahu maka agụmakwụkwọ bụ ịkwado WorldSkills Nigeria dị ka ihe nnọchianya mba maka mmepe nka na ịkwalite ndị ntorobịa,” ka o kwubiri.