Iwu Ntụliaka Ọhụrụ: Gọvanọ Osun steeti Ekeleela Onyeisiala Buhari

Aka na-achị Osun steeti bụ Ademola Adeleke etoola Onyeisiala Muhammadu Buhari maka inye nkwado ya na iwu ntuliaka ọhụrụ maka Naịjirịa.

Gọvanọ ahụ nyere ekele ahụ n’Abuja n’ụbọchị Fraịde, mgbe ọ na-agwa ndị nta akụkọ State House okwu mgbe ọ gara njem nleta nkwanye ugwu nye onye ndu Naijiria.

Gọvanọ ahụ, bụ onye nọ n’ụlọ ọrụ Onyeisiala nke mbụ ya kemgbe ọ malitere ọchịchị n’ọnwa Nọvemba afọ gara aga, kwuru na iwu ahụ nyere ohere maka nhọpụta ziri ezi nke butere nhọpụta ya dịka Gọvanọ steeti Osun.

Gọvanọ Adeleke kwuru na mwepụta nke iwu ntuli aka ọhụrụ a agbanweela echiche zuru ụwa ọnụ gbasara Naijiria.

Ọ sịrị: “Kemgbe nhoputa m, ọ dị m ka m bịa kelee Maazị Onyeisiala ma kelee ya maka ibinye aka n’akwụkwọ iwu ntuli aka n’ihi na m ritere uru na ya.

“Ụzọ ahụ emeghere maka ntuli aka n’efu na nke ziri ezi na mba ụwa na-eto Naijiria na a kwadoro Naijiria maka ọchịchị onye kwuo uche ya.

“Ya mere m ji nọrọ ebe a taa; ịhụ ya, kelee ya ma na-arịọ maka ọdịmma ya n’oge fọdụrụ n’ọchịchị ya.”

O kwuru na steeti Osun na-atụ anya nkwado n’aka gọọmenti etiti, ka ọ gara njem nleta a.

“Ọ dịghị ihe anyị kwurịtara nke ukwuu, nke ahụ bụ isi ihe kpatara ya. Anyị kelere ụfọdụ ihe ndị ọzọ m nyeferela, a ga m ahụ onye isi ndị ọrụ ka anyị kparịta maka ụzọ gọọmentị etiti ga-esi nyere steeti Osun aka,”  ọ gbakwụnyere.