Ụlọ Ọrụ Nkesa Ọkụ Abụghị Maka Ire Ere – Minista

A gwala ndị omebe iwu etiti n’Naijiria na ụlọ ọrụ nkesa ọkụ, Transmission Company of Nigeria (TCN) , abụghị maka nnyefe dịka ndị nta akụkọ na-ekwu.

Mịnịsta na-ahụ maka ọkụ, Abubakar Aliyu kwupụtara nke a n’ụbọchị Tuzdee ka ọ na-agwa ndị otu ọgbakọ omebe iwu na-ahụ maka ọkụ gbasara atụmatụ mmefu ego 2023.

Ewezuga ikwenye na TCN abụghị maka ire ere, Mịnịsta na ndị omebe iwu gosipụtara nchegbu na minista na-ahụ maka ego bụ Zainab Ahmed, ka na-akọwapụta ụfọdụ ọrụ ọkụ dị ugbu a dị ka ọrụ ọhụrụ n’ime atụmatụ mmefu ego nke 2023.

Sinetọ Gabriel Suswan onye bụ onyeisi oche nke kọmitii ahụ mechara kpọọ Minista ego ka ọ dokwuo anya n’ihu ndị omebe iwu, okwu gbasara ọrụ ọkụ dị iche iche nke na-aga n’ihu na-apụta na mmefu ego kwa afọ dị ka ọrụ ọhụrụ.

Sinetọ Suswan kwukwara ihe na-ewute ọtụtụ ndị omeiwu, na ọtụtụ ihe ọkụ eletrik arụnyere n’ofe obodo Naijiria enwebeghị ike.

Ọ gwara ndị na-ahụ maka ụlọ ọrụ na-ahụ maka ọkụ eletrik n’ime ime obodo ka ha dozie nsogbu ahụ, ma nyere aka dozie nsogbu ọkụ eletrik n’etiti ndị bi n’ime ime obodo.

Sinetọ Suswan kọwakwara na ọ dịghị ọrụ ọkụ ọbụla nke dị na Mambilla, Taraba steeti na mgbago ugwu Naijiria.

Ike Umenaba