Lee ọrụ anọ eji igwe BVAS arụọ na ntuliaka 2023

Ọ fọla ụbọchị iri na isii tupu ụbọchị ntuliaka ọkwa onyeisiala Naịjirịa eruo, ya bụ abali iri abụọ na ise nke ọnwa Febrụwarị afọ 2023.

Kamgbe oge ntuliaka a, otu okwu nke ọtụtụ nụrụla maka ya kwa mgbe kwa mgbe bụ BVAS nke bụ aha ịchafụ maka ‘Bimodal Voter Accreditation System’.

Dịka ụlọọrụ ‘Independent National Electoral Commission’ (Inec) si kwuo, Igwe BVAS a bụ ekwuchaa ọgwụ n’igbochi nrụrụaka na wuruwuru na ntuliaka n’ụdị ọbụla.

Ha kwuru na igwe BVAS ga-apụ iche n’igwe ‘smart card reader’, bụ nke e ji mee ntuliaka n’afọ 2015 na 2019.

Mana gịnị na gịnị ka e ji BVAS eme kpọmkwem, kedu etu o si arụ ọrụ, ọrụ ole ka ọ na-arụ? Ihe ndị a ka akụkọ a na-akọwa.

BVAS dịka akụrụngwa e ji edebanye aha n’akwụkwọ ntuliaka

Tupu ụbọchị ntuliaka, BVAS bụ akụrụngwa nke a na-eji edebanye aha ndị mmadụ n’ime akwụkwọ ntuliaka.

Ọrụ ọ na-arụ n’oge ahụ bụ nke na-akpọ Voter Enrollment Device. Ọ bụ ya ka a ga-eji debanye aha, were akara mkpịrịaka, ma sekwaa foto onye bịara idebanye aha ya n’akwụkwọ ‘voters register’.

BVAS dịka akụrụngwa e ji enyocha onye bịara ịtụ vootu

N’ụbọchị ntuliaka BVAS bụ akụrụngwa a ga-eji nyochaa onye bịara ịtụ vootu iji chọpụta ihe ndị a:

• Ma akwụkwọ ikike ịtụ vootu a kpọrọ ‘Permanent Voters Card (PVC) nke o ji bịa ọ bụkwa nke ezigbo ya
• Ma ọ bụkwa ya onwe ya nwe ya bụ PVC o ji bịa ịtụ vootu
• Ma ebe ọ bịara ịtụ vootu ọ bụkwa ebe o kwesịrị ịnọ tụọ vootu n’eziokwu

BVAS na-eme ihe ndị site n’ụzọ atọ:

• Site n’akara njirimara onye bịara ịtụ vootu nke a na-akpọ ‘Voter Identification Number (VIN) nke a na-edepụta n’elu PVC onye ahụ
• Site n’akara mkpịsịaka onye ahụ nke bekee kpọrọ fingerprints
• Site n’ihu onye ahụ, ma e see ya foto

Mana ọ bụ site na mkpịsịaka nakwa foto ka e jikarị enyocha mmadụ n’ụbọchị ntuliaka n’ihi na ọ ka eme ngwangwa.

Ọ bụrụ na BVAS enyochapụtaghị mmadụ n’ụzọ atọ ndị a, onye ahụ agaghị enweike ịtụ vootu n’ụbọchị ntuliaka.

Ọtụtụ ekwuola na onye aha ya dị n’akwụkwọ ntuliaka, onye ahụ enwekwaa VIN, na onye ahụ ga-enwe ike ịtụ vootu n’ụbọchị ntuliaka, mana Inec ekwuola ugboro ugboro na nke abụghị eziokwu.

Onye na-ejighi PVC ya gaa n’ebe a na-atụ vootu n’ụbọchị ntuliaka agaghị enweike ịtụ vootu.

Ma PVC adịghị, ịtụ vootu agaghị adị.

BVAS dịka akụrụngwa e ji eziga mpụtara ntuliaka

Ihe ọzọ e ji Igwe BVAS eme bụ iziga mpụtara ntuliaka gaa n’igwe kọmputa a na-akpọ ‘Inec Result Viewing Portal’ (Irev).

Dịka iwu Inec si dị, ọ bụrụ na atụchaa vootu n’otu ebe, onye ọrụ Inec ga-agụkọ vootu niile a tụrụ ebe ahụ ma kpọpụta mpụtara ya n’ihu mmadụ niile nọ ebe ahụ.

O mechaa nke a ọ ga-edeba mpụtara ntuliaka ahụ n’akwụkwọ, ma mapanye akwụkwọ ahụ n’ọgbọ ebe a nọrọ tụọ vootu, ebe onye ọbụla ga-ahụ ya.

Ọ ga-ejikwa igwe BVAS sere foto mpụtara ntuliaka ahụ ma ziga ya n’igwe IReV, ebe onye ọbụla nwere ịga hụ mpụtara ntuliaka ahụ ma dọtụkwaa ya n’ekwentị maọbụ na kọmputa ha, ma ha chọọ.

BVAS dịka ihe akaebe n’ụlọikpe

Ọrụ ọzọ BVAS ga-arụ bụ iji ya gbaa akaebe n’ụlọikpe ma ọ bụrụ na enwee ebubo nrụrụaka na ntuliaka.

A ga-eweta igwe BVAS n’ụlọikpe ma nyochaa ya iji mata kpọmkwem mmadụ ole e nyochara ma nye ha ikike ịtụ vootu nakwa vootu ole a gụkọtara n’ụbọchị ntuliaka.

Nke a bụ maka na akwụkwọ iwu ntuliaka ọhụrụ nke Onyeisiala Muhammadu Buhari binyere aka na ya n’ọnwa February afo 2022 nyere Inec iwu iji akụrụngwa tekịnụzụ wee nyochaa mmadụ tupu onye ahụ atụọ vootu n’ụbọchị ntuliaka.

Ọ dịghị otu a na ntuliaka nke afọ 2019.