Ihe atọ dị mere akwamozu Benedict XVI ji bụrụ ọpụrụiche n’ụka Katọlịk nke ụwa

Puku kwuru puku ndị mmadụ apụtala maka ịkwanyere onye bụbu Poopụ bụ Benedict XVI ugwu ikpeazụ na Vatican

Akwamozu onye bụbu poopu bụ Benedict XVI bụ ihe na-emetụbeghị n’ogologo oge n’ụka Katọlịk nke ụwa bụ na nke a ga-abụ oge mbụ otu Poopu ga-akwaozu Poopu ọzọ.

Akwamozu a nke na-aga n’ihu taa bụ Tọọzde n’ụka Saint Peter Basilica nke Rome. Nke a bụ ụka a na-ahụta dịka otu n’ime ndị kacha dị nsọ n’ụka Katọlịk nakwa otu n’ime ebe ndị njem na-aga ala nsọ na-akacha aga.

Poopụ Francis bụ onye na-achị ụka Katọlịk ugbua ga-anọ n’isi emume akwamozu onye bụbu Poopu bụ Benedict XVI, nke nwụrụ na ngwụcha afọ gara aga n’afọ 95.

A mụrụ Joseph Ratzinger na mba Germany dịka a họpụtara ya n’ọnwa Mee 2005 dịka Poopu ga-anọchite John Paul nke abụọ onye n’ọkwa ya nwụọ.

Cheta na n’ọnwa Febụwarị 2013 na Benedict XVI gbara arụkwaghịm n’ọkwa ya ihe na-emebeghị n’ọchịchị ụka Katọlịk kemgbe ihe ruru afọ 600.

E nwebeghị Poopu ọzọ rituru n’ọkwa kemgbe Gregory XII mere nke a n’afọ 1415. Benedict na-eso Celestine V onye mbụ mekwara otu ihe dị etu a n’afọ 1294.

Nrịtu n’ọkwa Ratzinger bụ maka okwu ahụike ya nakwa ịka nka nke mere akamozu ya ji bụrụ ihe pụrụiche.

Ọnụ na-ekwuru Vatican bụ Matteo Bruni kọwara na “Dịka Benedict XVI si chọọ, akwamozu ya ga-adị jụụ ma bụrụ nke obi ume ala.”

N’ime ihe ndị niile, ile ihe atọ mere akwamozu onye bụbu Poopu a jiri bụrụ ihe pụrụ ezigbo iche.